Ubunturen euskaraketa euskaratzea Librezalek koordinatuko du
Ubuntu software librez osaturiko GNU/Linux sistema bat da. 2004an sortu zenetik, ospe handia izan du sistema erabilerraz gisa, eta software librearen jarraitzaile askoren sistema bihurtu da. Informazio gehiago Wikipedian Ubunturen lokalizazioa Librezaletik kanpoko talde bat hasi zuen Launchpad plataforman 2007an. Hala ere, talde horretako partaide asko Librezaleko kide ere baziren. Urteak igaro ahala, taldearen jarduerak beherakada nabarmena izan du, eta 2014an bertako kideek lokalizazioa Librezalen integratzea erabaki dute. 2014ko udazkenean Ubunturen pakete guztien % 38a dago itzulita. Kontuan izan multzo horretan sartzen direla KDE eta GNOME bezalako proiektu handien paketeak ere. Proiektu berezi horietako bakoitzak bere itzulpen gunea du, eta ondoren Ubuntun integratzen dira. Inor Ubuntu euskaratzen laguntzeko prest badago, mesedez jarri harremanetan Librezalerekin gure posta-zerrendan.
3 iruzkin
-
#1 assar — 2014/11/23 @ 19:25
Twitter bidez esan digutenez, artikulu honen izenburuko “euskaraketa” hitza ez da zuzena.
2010. urtean izan genuen hitz horri buruzko eztabaida Librezaleren posta-zerrendan.
-
#2 Edu — 2015/03/30 @ 14:39
Twitterren jarri dizuet mezua, baina hona ere ekarriko dut: Ubuntun “Euskara” dioen lekuetan kendu, mesedez, zentzurik gabeko “(Espainia)” hori. Estatuaren araberako hizkuntza aldaerak adierazten du formula horrek. Ingelesa, esaterako, (UK), (USA), (Australia)… dago, bereizteko hizkuntza barietateak. Gaztelerarekin ere bai; izan ere ez da gauza bera Espainiarako edo Mexikorako lokalizazioa. Baina euskararen kasuan? Batueraz dago, hau da, Euskal Herria osorako estandarrean, ipar zein hego. “Euskara (Espainia)” jartzeak ez du zentzurik eta guztiz okerra da.
-
#3 Julen Ruiz Aizpuru — 2015/03/30 @ 14:51
Aupa Edu, nik ez dut Ubunturen proiektuan parte hartzen baina locale-ei buruz orokorrean hitz eginez zuzena deritzot tokian tokiko aldaerak izatea, hizkuntza ez ezik bestelako aldagaiak ere badaudelako, batez ere sistema eragile mailan. Zenbait argibide: http://librezale.eus/foroa/viewtopic.php?id=707
