Firefox OS euskaratu du Librezalek
Gailu mugikorretarako Firefox OS sistema eragilea euskaratu du Librezalek. Sakelakoetarako eta tabletetarako Android, iOS eta Windows Phone sistemen alternatiba irekia izan nahi duen sistema eragilea da Firefox OS.
Euskal Herrian dagoeneko salgai daude Firefox OS daramatzaten sakelakoak, Hegoaldean Telefónica konpainiak Movistar bidez merkaturatzen baititu, eta Iparraldean ZTE bidez eskura baitaiteke.
Uztailaren 21ean Firefox OS 2.0 bertsioaren garapena bukatutzat eman zen Mozillaren partetik, eta hortik aurrera sakelakoen fabrikatzaileen esku utzi dute softwarea, haiek beren pertsonalizazioak txerta ditzaten. Irailaren 1ean prozesu hori amaituko da eta hortik aurrera Firefox OS 2.0 duten lehen sakelakoak merkaturatuko dira.
Beste sistema eragileak ez bezala, Firefox Osren garapenaren oinarrian HTML5, CSS eta JavaScript daude, alegia, webgune arruntak sortzeko erabiltzen diren lengoaiak. Horrek hainbat abantaila eta desabantaila ditu. Lehenen artean, aplikazio berriak garatzeko erraztasun handia; izan ere, aski da webgunerako sortzen direnak moldatzea aplikazio bat sortzeko. Desabantailen artean dago oraindik, diotenez, apur bat motelagoak direla aplikazio horiek.
Sakelako sistemen merkatura iristen azkenetakoa izateak ere eragozpen bat dakar Firefox OS erabiltzen duenarentzat: harentzat sortutako aplikazioen multzoa txikia da momentuz, eta ‘killer app’ direnak (WhatsApp batez ere) ez daude oraindik. Hala ere, WhatsAppen sarearekin konektatzen diren aplikazio pare bat daude, esaterako ConnectA2, gure WhatsApp kontaktuekin ditugun eguneroko harremanetarako aski direnak.
Firefox OS 2.0 bertsioa erabiltzaile arruntentzat euskaraz erabilgarri egongo den lehena da, Librezaleren lanari esker. Euskarazko bertsioaren akatsak ikusiz gero, mesedez jarri harremanetan Librezalerekin gure posta-zerrendaren bidez.
4 iruzkin
-
#1 hezpide | Firefox OS euskaratu du Librezalek — 2014/07/24 @ 9:02
-
#2 Igor Gaminde — 2014/08/03 @ 21:02
-
#3 assar — 2014/08/03 @ 22:09
Kaixo gabon,
http://firefoxosbuilds.org/ webgunetik deskarga daitezke ZTE Open gailuetarako build ez ofizialak. Oraindik 1.3 bertsioa argitaratu dute haien webgunean, baina 2.0 bertsioaren build-a ere badago, nahiz eta publikoki argitaratuta ez egon[1].
Telefonoa Telefónica konpainiarena bada, bertsio ofizialei dagokienez, dirudienez ez da egongo ZTE modeloentzako Firefox OS 2.0 bertsiorik, eta 1.3 bertsioa urrian argitaratuko dute[2].
[1]http://download.firefoxosbuilds.org/zteopen-2.0-imgs.zip
[2]http://librezale.org/pipermail/librezale/2014-July/005884.html
-
-
#4 Igor Gaminde — 2014/08/04 @ 12:16
