Google IO garatzaileen ekitaldian jakin berri denez, Googlek VP8 bideo codec-a libre utzi du, erabiltzeko murriztapenik gabe.
Zurrumurru asko izan da azkenaldian codec honen inguruan eta Googleri libre uzteko eskari asko egon da, tartean FSFek Googleri bidalitako gutun irekia ere bai, adibidez. Gaurkoan, Googlek VP8 libre utziko duela iragarri du eta Opera eta Mozillarekin batera WebM proiektua eman du argitara.
(gehiago…)
Atzodanik prest daude Firefoxen bertsio mugikorraren (Firefox Mobile) gaueroko paketeak Androiderako, plataformaren 2.0 eta bertsio berriagoentzat zehazki. Pakete hauek gauero berritzen dira automatikoki kodean egindako azken aldaketekin eta Stuart Parmenter garatzaileak bere blogean jakitera eman duenez, oraindik pre-alpha kalitatea daukate. Egonkortasun aldetik berde xamar egon arren, pausuak eman eta eman ari dira azkenaldian.
Mugikorretarako Firefoxen hurrengo bertsioa 1.1 da eta laster izango da kalean, Maemo plataformarako soilik.
Awn (Avant Window Navigator) Linux sistemetan erabil daitekeen dock motako nabigazio-barra da. “Dock” hitza euskaratzeko atrake, kai edo portu hitzak erabil daitezke, eta bere funtzioa aplikazio-abiarazleen, dokumentu irekien ikonoen, jakinarazpen-areen eta mota askotako applet edo aplikazio txikien atrakatze-gunea izatea da. Hobeto ulertzeko, sistema eragile nagusietako mahaigainetan ageri ohi den beheko barraren parekoa da, baina moldagarriagoa izan ohi da. Awn-ren pareko ezagunena eta itxura batean bere inspirazio-iturri izan dena Mac OS X sistemen Dock aplikazioa da.
(gehiago…)
