Librezaleok gure webguneko foroa kudeatzeko erabiltzen dugun aplikazioak bertsio berria dauka. FluXBB PHP lengoaian programatuta dago eta PunBB aplikazioaren fork modura jaio zen 2008. urtean.

Hasieran FluxBB garatzeko PunBBren 1.3 adarra erabili bazen ere, geroago 1.4 adar berria sortzea erabaki zuten. Bertsio honetan hainbat hobekuntza egin zaizkio aplikazioari. Orain gaiak zatitu eta batu egin ahal dira, eta irakurri gabeko gaien jarraipena egiteko modua hobetu da. Bestalde, modu lehenetsian estilo gehiago edukiko ditugu eskura, gure foroaren itxura klik bakarrean aldatu ahal izateko. Sindikazioa (RSS jarioak) ere hobetu egin da, eta BBCode berri gehiago daude mezuen idazketa errazteko.

Sistemaren administrazioari dagokionez, oraindik aurrera posible da moderatzaile bat baino gehiago egotea talde bakoitzeko. Segurtasunaren alorrean, talde-mailako kontrolak gehitu egin dira, eta erabiltzaile-zerrendak / profilak ikusteko baimenak talde-mailan aldatu ahal dira orain.

Berrikuntza nabarmenenak horiek izan arren, badaude beste txikiago batzuk ere, aplikazioaren funtzionamendu orokorra leuntzen dutenak. Informazio gehiago, FluxBB-ren webgunean.

Euskarazko bertsioa erabili nahi izanez gero, deskargatu hizkuntza-paketea eta kopiatu FluxBBren instalazioaren lang karpetara. Ondoren, sartu forora administratzaile modura eta aukeratu “Euskara” administrazio-panelaren Options (Aukerak) atalean.