Bai ondo oporretan, denboraz arduratu gabe bideetan galtzeko aukera paregabea, eta galtzeko aitzakia ederra ere mugikorrerako StreetComplete aplikazioak ematen diguna: OpenStreetMap mapak hobetzea! (OpenStreetMap Organic Maps edo OsmAnd mapa aplikazio libreek erabiltzen dituzten mapak dira).

StreetComplete aplikazioak erraz erantzuteko moduko erronkak jartzen dizkigu, zein da kale honen izena? Zein bidearen zoladura? Asfaltoa? lurra?…

OpenStreetMap proiektuari ekarpenak egitea guztien eskura jartzeaz gain entretenigarri izateko asmoa du, itzulpenean ikusi daiteke gamifikazioa aztertzen duten aldaketak datozela.

Nola erabili

• Oraindik ez baduzu, sortu zure OpenStreetMap erabiltzailea,
• Instalatu StreetComplete F-droid edo Google Play biltegitik,
• StreetComplete aplikazioaren ezarpenetatik, hasi saioa OpenStreetMap zerbitzarian,
• Baimendu StreetComplete aplikazioa galdetzen zaizunean.

Kitto, erronkak erantzuteari ekin ahal diozu! Adi, zure erantzunak mapara doaz zuzenean, ez dakizuna ez erantzun. Galdera bat ezkutatzeko eman ezkerreko “beste erantzun bat…” estekari.

Ondo pasa eta bidali postalen bat!