[Librezale] Galdera bat, Goizuetatik

[Leitzaldeko euskara zerbitzua]

Kaixo:

Goizuetako kultura eta euskara taldetik galdera bat egin nahi diogu 
librezaleko foro honetan ari zareten guztiei, inork argibideren bat 
emanen digulakoan. Ea kontua argi eta labur azaldu dezakegun:

Goizuetan euskararen inguruko zenbait lan-ildo definitu eta horietan lan 
egin nahi dugu. Teknologia berriak eta euskara, besteak beste. Hainbat 
gauza egin liteke, ziur asko, eta guk oraingoz horietako bat prestatu 
nahi dugu. Labur azalduta, ordenagailuarekin euskaraz lan egiteko 
moduen, baliabideen eta tresnen inguruko saio bat antolatu nahi dugu. 
Erabat zehaztuta ez daukagun arren, trebakuntza-saio modura-edo antolatu 
nahi genuke. Alegia, herriko jendea deitu, elkartu, eta  
ordenagailuarekin euskara erabiltzeko ditugun aukerak aurkeztu eta 
azaldu (sistema eragileak, bestelako programak, hizkuntza 
baliabideak...).  Saioak praktikoa izan beharko luke, ulergarria, eta 
jendeari beldurra kentzea lortu beharko genuke, besteak beste. 
Proiektore bat eta ordenagailu bat baliatuta, bertan erakutsi beharko 
genuke aukerak zein diren, eta euskaraz lanean hasteko urratsak zein 
diren eta nola egiten diren. Jakina, bide batez, software librearen 
apologia egiteko aprobetxa daiteke, horren beharra ere handia izanen baita.

Saioaren hartzaileak, gure aurreikuspenean behintzat, ordenagailuaren 
erabiltzaile arruntak izanen dira, ezagutza eta gaitasun maila 
ezberdinekoak. Gehienak, ziur asko, software librea erabiltzen ez 
dutenak. Jende gaztea, ziur asko, baina ez soilik.

Argibideak eta azalpenak emateko behar adinako ezagutza eta gaitasun 
teknikoa duen "hizlaria" beharko genuke, beraz, baina baita publiko 
arruntari argibideak modu xamur eta argi samarrean emanen dizkiona ere, 
azalpen eta xehetasun teknikoekin gehiegi ikaratuarazi gabe. Saioa, 
bestalde, maiatza aldera egiteko asmoa dugu, ahal izanez gero behintzat.

Beno, horiek dira gure eskaera, proposamen, galdera edo dena delakoaren 
inguruan eman ditzakegun argibideak. Ez dakit asko eskatzea den, 
horrelako saioak modu irekian han eta hemen egin ote diren...

Eta zer da mezu honen hartzaileei galdetzen dizueguna? Bada, ea saio 
hori emateko pertsona edo talde egokia ezagutzen ote duzuen, haren 
erreferentzia eman diezagukezuen, zer baldintzatan etor lite(z)keen, eta 
gisakoak.

Besterik gabe, eta aldez aurretik eskerrak emanez, jaso gure taldearern 
agurra.

Dabid Anaut (Goizuetako kultura eta euskara taldearen izenean).