[Librezale] Buber sariei buruzko artikulua (3. bertsioa)

Ast, Abe 15, 20:59:03, CET 2011

Aupa lagunok:

Julenek zerrendara bidalitako zuzenketekin eta Gorka Azkaratek 
pribatuan bidali dizkidan zuzenketa eta hobekuntza ugariekin, bertsio 
berri bat prestatu dut (mezuak berdina izaten jarraitzen du):

==================================================================

Buber Sariak 2012. Eman diguten sariari uko egiten diogu

==================================================================

<a href="http://www.interneteuskadi.org/eu/">Internet&Euskadi</a> 
elkarteak antolatzen dituen <a 
href="http://buber.interneteuskadi.org/web/">Buber Sarietako</a> bat 
eman digutela jabetu gara. Sari horri uko egiten diogu 
eta gure erabakia ulertua izan dadin, gertatutakoa azaldu nahi dugu:

1) Buber Sarietan hautagai izateko, aurkeztu beharra dago. 
Internet&Euskadik jarritako <a 
href="http://buber.interneteuskadi.org/web/index.php/cms/eu_ES/reglamento">araudiaren 
arabera</a>, Microsoft DOC jakin bat bete beharra dago eta ezarritako 
epe batean helbide zehatz batera igorri.

2) Ez ginen aurkeztu. Ez genuen araudian eskatzen den ezer egin.

3) Antza denez, hautagaiak bozkatzeko aukera egon zen eta ondoren 
epaimahaikideek hautaketa ere egin zuten.

4) Guk sari horietarako hautagaiak ginenik jakin gabe jarraitzen genuen 
eta are gutxiago finalista bezala hautatuak izan ginenik.

5) Gure harridurarako, sariak banatu baino bi egun lehenago sarietako 
batean finalistak ginela esaten zuen e-posta bat jaso genuen. 
Antolatzaileek erakundearen izenean joango ziren pertsonak baieztatzea 
eskatzen zuten. Baita irabazle ateratzekotan saria jasoko zuen 
pertsonaren izena, kargua eta telefonoa. Hori guztia astearte arratsalde 
batean, bi arratsalde beranduago Bilbon burutuko zuten ekitaldi 
baterako.

6) Ez genuen erantzun. Ez genien joaterik geneukan ala ez esan eta 
eskatzen zizkiguten datuak ere ez genituen bidali. Alderantziz, beste 
arrazoi batzuen artean seriotasun falta nabarmena zela eta, gure 
hautagaitzari uko egitea edo ez, irabazle suertatzekotan, sariari uko 
egin edo ez pentsatzen hasi ginen. Baina hain ordu gutxi izanik, <a 
href="http://librezale.org/wiki/Zer_da_Librezale">gurea bezalako 
talde</a> ireki eta horizontal batean, erabaki bat adosteko betarik ez 
genuen izan.

7) Sarietara ez aurkeztu arren, gure alde bozkatu ez arren eta eskatzen 
ziguten ezertxo ere ez egin arren "Software librea ondoen sustatzen duen 
weba" sariaren irabazleak atera ginen.

8) Sari horretara benetan aurkeztu ziren beste batzuk alboratuak izan 
zirela ulertzen dugu.

9) Ekitaldia burutu zenetik bi aste igaro dira eta oraindik inork ez 
digu irabazle izan ginenik jakinarazi.

Gure uste apalean, sari hauek ez dira gutxieneko 
sinesgarritasun batekin antolatu, erabaki eta banatu. 
Ulergarria denez, Internet&Euskadik arauak dauden bezala mantentzen 
dituen bitartean behintzat, sariak aurkeztu direnen artean 
banatu behar zirela defendatzen dugu edo dagokion atala, irabazlerik 
gabe utzi. Gainera, aurkeztu ere ez direnak irabazle 
ateratzearena lehen aldia ez dela entzun dugu eta horrek ere asko 
arduratzen gaitu. Urte bakoitzean Buber Sarietara irabazteko ilusioz 
aurkeztu direnek, hautaketa zintzoa merezi dutela uste dugu.

Bestalde, adierazpen hau egiten ari garen honetan, larriak iruditzen 
zaizkigun beste bi gai aipatu nahi ditugu. Alde batetik, sarien 
babesle bat (EITB) sarietako baten irabazle izana ("Proiektu 
solidarioa" hain zuzen). Egoera hau nola edo hala saihestu behar zen 
zerbait iruditzen zaigu.

Beste aldetik, Internet&Euskadiko webguneak euskaldunak 
zokoratu egiten dituela salatu nahi dugu. Euskal erakunde 
batek, gutxienez, euskarari erdarari ematen dion bezainbesteko 
garrantzia eman behar diola uste dugu; herritarrei begira burututako 
jardueretan behintzat, inolako zalantzarik gabe. Are gehiago 
Internet&Euskadik berak bere helburuetako bat <a 
href="http://www.interneteuskadi.org/es/menu,internet--euskadi/menu,objetivos/menu,vision/">"IKTetan 
euskararen erabilera sustatzea"</a> dela dioenean eta bere baloreetako 
bat <a 
href="http://www.interneteuskadi.org/es/menu,internet--euskadi/menu,objetivos/menu,valores/">"Interneten 
euskararen erabilera sustatzea eta defendatzea"</a> dela dioenean. 
Buber Sarien banatze-jaia horrelako handitasunez antolatzen duen 
bitartean (gala moduko zeremonia bat egin zen, hainbat musikari eta 
pintxo barne), onartezina iruditzen zaigu Internet&Euskadik oraindik 
bere webgunea euskaraz ez izatea.

Sari horien inguruan adierazpen hauek egin arren, Librezaleko 
partaideok argi utzi nahi dugu ez gaudela Buber Sari batzuen aurka, ezta 
euskal esparruan teknologia berriak sustatzeko sarien aurka ere; 
gutxiengo kalitate bat betetzen duten bitartean ez behintzat.

Erabaki hau erantzukizunez hartu dugu eta gure arrazoien sakontasuna 
ulertuko denaren esperantzarekin agurtzen gara. Adierazpen hau 
Internet&Euskadi elkartera ere bidali dugu jakinean egon daitezen.

Eskerrik asko eta goraintziak aurtengo Buber Sarietan ibili zaretenoi 
(antolatzaileak, epaimahaikideak, sari banatzaileak, sarituak eta 
sarituak izan ez zaretenoi), batzuk ezagunak eta lagunak bait 
zaituztegu. Horrek erabaki hau hartzea asko zaildu digu, baina, hala 
ere, mezu hau gizarteratzea zuzenena zela iruditzen zaigula ulertuko 
duzuelakoan gaude.

Agurrak guztioi,

Librezale taldeko asanblada.

==================================================================

Eskerrik asko guztioi parte hartzeagatik! Aupa ekipo!

Oraintxe bertan testu hau Buber Sarietako arduradunei e-mailez bidaliko 
diet eta jarraian gure blogean argitaratuko dut. E-mailez zabaltzeko PDF 
bat prestatu dut (ikus atxikitutako fitxategiak).

Goraintziak,

Txopi.
-------------- hurrengo zatia --------------
A non-text attachment was scrubbed...
Name: BuberSariak-Librezale.odt
Type: application/vnd.oasis.opendocument.text
Size: 40539 bytes
Desc: ez dago erabilgarri
URL: <http://librezale.eus/pipermail/librezale/attachments/20111215/1d9deb24/attachment-0001.odt>
-------------- hurrengo zatia --------------
A non-text attachment was scrubbed...
Name: BuberSariak-Librezale.pdf
Type: application/pdf
Size: 48205 bytes
Desc: ez dago erabilgarri
URL: <http://librezale.eus/pipermail/librezale/attachments/20111215/1d9deb24/attachment-0001.pdf>